من سنين والحقن المجهري بيساعد ملايين من الناس انهم يحققوا أمنية ان يكون عندهم طفل

لكن ضروري ان الأب والأم يكونوا على علم مش بس بمميزات الحقن الجهري، لكن كمان النقط الغير مرغوب فيها . لازم يكون عندهم توقعات صحيحة بعيدا عن الدعاية التجارية الي بتعملها أغلب مراكز التخصيب والحقن المجهري

اتكلمنا قبل كدة على الحالات الي بتستفيد من الحقن المجهري، لكن خلينا نراجعها سريعاً

الحقن المجهري بيساعد العديد من المرضى الي عندهم مشاكل تمنعهم من الحمل. أهم هدف لعملية الحقن المجهري هي تحقيق حمل ناجح وطفل سليم.

امتي تكون عملية الحقن المجهري مفيدة؟

١- انسداد قنوات فالوب عند السيدات
٢- كبار السن أو الي بيعانو من احتياطي بويضات منخفض
٣- العقم عند الرجال
٤- العقم غير المفسر
٥- متلازمة تكيس المبايض
٦- بطانة الرحم المهاجرة
٧- تشخيص مشاكل التخصيب. في بعض حالات العقم غير المبررة
٨- فحص الأجنة للأمراض الوراثية قبل الزرع

مخاطر الحقن المجهري
١- نسبة نجاح الحقن المجهري بتتراوح بين ٤٠٪ و١٥٪ وده بيعتمد على عوامل كتير أهمها عمر السيدة. عشان كدة غالبا الأزواج بيضطروا يعملوا أكثر من دورة واحدة من العلاج قبل نجاحهم. طبعا ده بيختلف بين سيدة وسيدة أخرى لكن المهم أن نكون واقعيين وإيجابيين في نفس الوقت تجاه فرص النجاح.

٢- النقطة دي نقدر نعتبرها ميزة مش عيب لكن كتير من السيدات مش بيكونوا عارفنها عشان المراكز مش بتتكلم عنها. بالنسبة للأفراد الي عندهم احتمالات أعلى لوجود أمراض وراثية في الجنين ممكن يطلبوا التشخيص الوراثي قبل الزرع. بالطريقة دي ممكن نعرف بوجود بعض الأمراض زي متلازمة داون واختيار الأجنة السليمة لزرعها.

٣- زي أي عملية طبية أكيد فيه احتمالات حدوث آثار جانبية لكن ده بيقل كتير مع خبرة فريق العمل. من الآثار الجانبية الي بنهتم بها هي متلازمة فرط التحفيز. أهم حاجة لتجنب حدوث المتلازمة دي هيا اختيار طريقة العلاج.

٤- في علاجات الحقن المجهري غالبا ما يكون هناك أكثر من جنين يعاد إلى الرحم ، وده بيؤدي إلى احتمالية أعلى للحمل المتعدد، حوالي 20-30 ٪ من حالات الحمل بالتخصيب المجهري يمكن أن يؤدي إلى الحمل المتعدد. ده طبعا بيزود احتمالات الولادة المبكرة، والإجهاض، والحاجة إلى ولادة قيصرية ومشاكل صحة الرضيع مع حالات الحمل المتعددة. لو عايزة ننجنبي ده ممكن تطلبي نقل جنين واحد أو ان يكون في المركز طبيب نساء وتوليد شاطر وطبيب أطفال متخصص في الأطفال حديثي الولادة زي ما احنا عندنا في مركز د. حسن جعفر لصحة المرأة.

٥- هناك احتمال أعلى بقليل للحمل خارج الرحم. مع الحقن المجهري بتزيد نسبة الحمل خارج الرحم إلى ١-٣٪ ، وخاصة في السيدات الي عندهم قناة فالوب متضررة.

٦- بعض الأبحاث بتربط بين ارتفاع مستويات هرمون الاستروجين المرتبطة بالتحفيز بانخفاض الوزن عند الولادة في الأطفال. ده بسبب ان مستويات الإستروجين العالية بتأثر على البيئة داخل الرحم. عشان كدة احنا بنفضل التخصيب الطبيعي والمعتدل لأننا نعتقد أن نجاح العلاج مش مجرد الحصول على طفل لكن الحصول على طفل بصحة جيدة.

٧- الحقن المجهري تجربة شديدة التوتر والإجهاد للزوجين عشان بيكونوا منتظرين يعرفوا النتائج وخايفين من عدم القدرة على النجاح. احنا بننصح الزوجين دايما انهم يدوا أولوية لحالتهم النفسية ويكون عندهم توقعات صحيحة عشان التجربة تكون ذكرى حلوة.

٨- عملية الحقن المجهري ممكن تكون مكلفة خصوصا مع الأدوية والفحوصات. مهم ان الزوجين يكونوا على علم باحتمالات زيادة التكاليف قبل بدء العلاج عشان يقدروا يخصصوا ميزانية مناسبة. الطبيب بيقدر يقعد مع الزوجين ويناقش معهم الخطة قبل البدء والاتفاق على أنسب طريقة تكون مرضية وفي نفس الوقت تكلفتها مناسبة.

في النهاية وجود فريق عنده خبرة ووجود التخصصات المختلفة بدل من التركيز على حدوث حمل فقط مهم جدا. اتكلموا في كل الي ييجي على بالكم واسألوا كل الأسئلة واعملوا بحث على الانترنت كمان عشان تتأكدوا من صحة المعلومات وسمعة فريق العمل. بعد كدة خلوا ثقتكم في ربنا وبعدين الطبيب الي بيتابع معكم واعتبروا نفسكم فريق واحد عايز يحقق نفس الهدف